Margarinefabrikki Savalimmiuni inuusuttunut ornittagaavoq. Sulisunullu ilaqutariittut misinnarluni.
Torshavnip qeqqaniippoq Margarinfabrikki, kikkunnulluunniit meeqqanut inuusuttunullu klubbi. Tamanna sapaat minillugu ullut tamaasa orninneqartarpoq ataatsimooriartorlutik eqqissisimaariartorlutillu, Salua Manai, sumiiffiup aqutsisua oqaluttuarpoq.
“Maani aallussinissaq piumasaqaataanngilaq. Sammisassat tamarmik kajumissutsimik peqataaffigineqarsinnaapput, namminnerlu nuannarisaminnik sammisassaqarsinnaallutik. Assersuutigalugu guitarerneq, titartaaneq imaluunniit pinnguaatersorneq. Ilaasa Margarinfabrikkimut takkuttartut ‘ujartuisarput’. Tassaasinnaapput ilinniagaqarnikkut pitsaanerpaamik inissisimanngitsut, ilaallu immaqa timersortarunnaarsimasuullutik. Taamaakkaluartorli takkukkaangamik nalunngilaat kimiilluunniit nalilersortinneqaviaratik.
Suut aamma inuusuttuaqqat isertartut ilisarnaatigisarpaat?
“Ilisarnaatiginerpaasarpaat, angajulliunerulaartut sammisanut ornittakkanut peqataajunnaarsimasut. Maangakulanerusarput ikinngutitaariartorlutik, aamma angerlarsimaffimminiit sammisassaqarluarnerusarmat.
Ilaasa Margarinfabrikki angerlarsimaffiup aappaattut isigisarpaat. Taakkua klubbi ammaraangat takkuttarput matugaangallu ingerlasarlutik. Allat aalajangersimasunik sammisaqartitsinerni taamaallaat takkuttarput, aamma ilai inersimasumik aalajangersimasumik sulisoqaraangat takkuttarlutik. Pissutigalugu tassumunnga inummut toqqissisimanartumik misigisaramik.
7. klassimiit qummut nukappiaraannangajaat takkuttarput. Misiliisimavugut paasiniarlugu sooq taamaattoqarnersoq, tassami kissaatigaarput niviarsiaqqat amerlanerusut takkuttarnissaat. Ajoraluartumik isumaqarpunga tamanna Savalimmiuni tamakkiisumik isigalugu unammillernartuusoq. Niviarsiaqqat klubbit soqutigisarinngilaat.”
Klubbersi suna pikkoriffigaa?
“Pædagogikkikkut immikkut pikkoriffigaarput attaveqaqatigiinnermut sulineq.” Nukappissat naalanngitsut klubbimut orniguttuartartuupput, kisiannili sualummik ukioq manna amerlanerupput, taamaattumik inuusuttut inuunermi piginnaasaqarnerulernissaannik siunertaqartumik oqaloqatigiittarfeqalersimavugut. Pingaartumik iiliuuseqannginnermi eqqarsaqqaarnissaq ilinniartarpaat. Naaggaarsinnaasariaqarput. Taamaasillutik misigissavaat inersimasunut tatiginnissinnaallutik, taamaasillutik eqqarsaatitik annissinnaanngisatik nammineq pigiinnassanngilaat.
Tamarmik inissaqartinniarsarivagut, kisianni ilaanni ajornartorsiutaasinnaasarpoq, soorlu politiinut pinerluttuliornermullu attuumassuteqarluartut takkukkaangata, taava allat tamarmik qimaguttarput. Allami ajortuliunnginnissaa pinaveersaartinniarlugu qanoq annertutigisumik ikiuissanerluta apeqqutaaginnalertarpoq. Oqimaaqatigiissaariniarneq oqitsuinnaaneq ajorpoq.
Eqqarsartaatsikkut katsorsaasorlu inuusuttunut ilinniartitsisisarpugut, ilaatigut umiatsiami iputsitsilluta. Tassa nukinnik atuilluarnissamut iluaqutaalluartuuvoq. Saniatigullu susassaaleqiinnarlutik killissarsioratik piffissamik atorluaapput. Siornatigut taama iliuuseqartarsimanngilagut, kisianni taamaasioqqinnissarput qularnanngilaq, tassami iluaqutaammat. Taakkua ammanerupput unneqqarillutillu – aamma imminnut. Siornatigut inersimasumut oqaaseqaraanni oqartarput ‘snitchertoq’, kisianni maanna taamaakkunnaarnikuuvoq.”
Soormita atassuteqaatit nukittuut pilersissinnaalluarpisigit?
“Ilaatigut nassuiaatissaq annerpaaq tassaavoq sulisunik tigumminnilluarsinnaanerput.” Taakku tamarmik ukiuni arlalinni maani sulisimapput, taamaattumik meeqqat ilisarisimalluarlugit. Tamanna atassuteqaatit nukittunerulernissaannut sulissutigineqalersinnaatippai. Uagut ilaqutariittut ittarpugut aamma suliffiup avataatigut naapittarluta. Arlallit ukiorpassuit ilinniartooreerlutik uteqqittarput maanilu sulileqqillutik. Ullualunnguit qaangiuppata Parisimut ataatsimoorluta aallassaagut, aammalu siornatigut sulisorisimasagut marluk Danmarkimut ilinniariarlutik aallarsimasut ilagissavaatigut.
Margarinfabrikki pillugu
Margarinfabrikki Tórshavnip qeqqaniippoq aasarlu manna ukiut 30-nngortorsiussallugit. Maanna ullut tamaasa nal. 12-17 akornanni meeqqat 50-it missaat (3. klassimiit 6. klassimut) takkuttarput. Taavalu nal. 18-imiit 22-imut inuusuttuaqqat 40-t missaat (17-inik ukiullit tikillugit) takkuttarput. Tallimanngornikkut arfininngornikkullu unnuakkut nal. 01 tungaanut ammasarpoq. Katillugit arfineq pingasut sulisuupput, amerlanerit perorsaasuullutik.
Klubbi angisuumik ataatsimoorfiusinnaasumik initaqarpoq, tassani nerisarput, titartaasarput, pinnguaatersortarput guitarilu atorlugu. Qarasaasiartarfik immikkut inimiippoq. Ini nipilersortarfimmi atortoqarlunilu nipilersuuteqarpoq. Ini eqqumiitsuliortarfik podcastiliortarfillu. Ullut tamaasa pilersaarusiorneqarsimasunik sammisassaqartitsisoqartarpoq. Ataasinngornikkut Dungeons and Dragons ingerlanneqartarpoq. Marlunngornikkut linoleumimik naqiterisoqartarpoq. Pingasunngornikkut skatertarfiliartarput Nerf-erlutillu imaluunniit illup iluani isikkamik arsarlutik. Sisamanngornikkut ataasiakkaarluni nipilersornermik ilinniartitsisoqartarpoq aammalu eqqumiitsuliornermik suliaqartoqartarluni. Tallimanngornikkut naluttarfimmukartarput, Dungeons and Dragonsimik pinnguarlutik aamma pinnersaasiorlutik.
Del artiklen
