Apersuineq. Savalimmiuni klubbit suliassarisinnaavaat inuusuttut innuttaasuulluaqataalernissaat, oqarpoq klubbimi aqutsisoq naalagaaffimmilu ilisimatusartoq Beinta Árnadóttir Gregersen.
Savalimmiuni klubbiulluni oqitsuinnaaneq ajorpoq. Aningaasaliissutit annikipput inuusuttuaqqanullu klubbi Húsið (Illu) 2006-imi pilersinneqarmalli arlaleriarluni allamut nuuttarsimavoq. Maannakkorpiaq illoqarfiup isiginnaartitsisarfikuani inissisimapput, kisianni aamma taamaallaat utaqqiisaasumik. Nalimmassartariaqarnarpoq. Pisut takkuttut akueralugit aaqqiissutinik naleqquttunik ujartuisarpugut, 48-nik ukiulik Beinta Árnadóttir Gregersen, sumiiffimmi aqutsisoq oqarpoq.
Aallartinneraniilli peqataasimavoq. Ukiut arlallit qimaqqasimagaluarpaa, ilaatigut naalagaaffiit pissusiinik ilisimatusarfimmi ilinniagaqarnermini. Maanna uternikuuvoq, isumaqarami savalimmiuni inuiaqatigiinni inuusuttunut klubbi pingaaruteqarluinnartuusoq:
“Angajoqqaanut sanilliullugu uagut allatigut tusarnaartarpugut. Taamaattumillu inuusuttut aamma allatigut tusarnaartarpaatigut, taannalu periarfissatsialaavoq taakku pitsaasumik inuiaqatigiinni innuttaasunngornissaaminnut. Tamanna pingaarnerpaatut suliassaraarput.”
Inuusuttut ilissinnut isertartut suut immikkut ilisarnaatigisarpaat?
“Tassa assigiinngitsorpassuupput. Ilai inooqataanikkut ajornartorsiuteqarput. Ilai timersortartuupput. Ilai naalanngitsuupput. Klaksvikimi atuarfik ataasiinaavoq, taamaattumik tamarmik tassanngaanniit imminnut ilisarisimapput. Ilaasa aamma upperisarsiornermut avatangiisinit imminnut ilisarisimapput. Tunuliaqut apeqqutaatinnagu amerlanerit klubbi angerlarsimaffik aappaattut atortarpaat. Ilaatigut angerlarsimaffik pingaarnertut atortarpaat, tassami angajoqqaaminnit
isumassorneqarneq soqutigineqarnerluunniit misigisimanngilaat. Taamaattumik Danmarkimi klubbinut sanilliullugu immaqa inuusuttunut maani eqqissisimaarfittut atornerusarpaat. Aammalu allanngueqataanissatsinnut periarfissaavoq”
Qanoq allanngueqataasarpisi?
“Inuusuttut tamatigut ammasumik isumassornertalimmik tatiginninnertalimmillu naapittarpagut. Soorlu aanaakkutut aataakkutullu nalinginnaasumit kiffaanngissuseqartitsinerusartutut. Amerlasuut ajornartorsiuteqarlutik ikiorneqarnissaminnik kissaateqanngillat, kisianni una periuseq atorlugu tikinneqarsinnaasarput. Tamannak oqaatigereerlugu, perorsaanissaq oqitsuinnaaneq ajorpoq. Uagut immikkut ittumik perorsaanermut iliuusissanut ataasiakkaanullu periarfissanik peqanngilagut. Aamma misigivunga inuusuttut ullumikkut aallusserusussuseqannginnerusut, aammalu pituttorsimaffeqarusunnatik. Assersuutigalugu ataatsimoorlutik nereqatigiittarnissaq kissaatigimmassuk sivisuumik allatsiffissamik nivinngasuuteqarnikuuvugut tassani nerisassiorneq, nerriviliorneq, nerriviup imaarnissaa erruinissamullu allatsissinnaallutik. Angunissaanulli iliuuseqartorusunngilaq.”
Qanoq iliornikkut inuiaqatigiit iluanni pitsaasunik innuttaasunngortissinnaavisigit?
“Pingaaruteqarpoq siullermik aqqusinermiit peersinnissai sianiilliornerit ikiliniassammata. Taamanikkut klubbi pilersinneqarpoq illoqarfimmi aserorterineq annertoorujussuummat. Ukiut marluk matuma siorna borgmesterip oqarfigaanga politiit “aseruinermut konto” matuinnarsinnaanngoraat, tassami asuliinnaasumik aserorterineq annikillisimangaarmat. Aammattaaq pitsaaneruvoq klubimi sianiiilliornissaq allamiit sianiilliornissamiit sanilliullugu, maanimi naviiginnanngikkaluarlugit oqaloqatigiissutigisinnaasaratsigit.”
Suut sammisassat ilissinnut iluaqutaanerpaasarpat?
“Inuusuttunut aqqut tassaavoq aalajangeeqataatillugit tatigillugillu, taamaasiornikkut pitsaanerpaasarpoq kissaatigisaminnik sammisaqartissallugit. Tassa suli malittarisassaqarlutillu killissaqarput, kisianni aalajangersimasunik sammisaqartinneqarneq ajorlutik. Taakkua namminneq aquttarpaat, pisariaqartikkaangamikkulu inersimasunit ikiorneqartarlutik. Uanga misigivunga inuusuttut akisussaaffimmik tiguserusussuseqartuusut, kisianni aatsaat namminneq piumasaminnik aallaaveqarteqqaarlugit. Tamanna isumaqarpoq, amerlanertigut issiaarlutik oqaloqatigeerujuuginnartartut. Ilaasa nerrivimmi pinnguaatersortarput allat titartaasarput. Ilaatigut takkuttarput suliffittaarnissaminnik ikioqqullutik, asanninneq pillugu aliasuutiminnut qaangiinissamut ikioqqullutik imaluunniit allamik tunngasumik, taamaattumik pingaaruteqarpoq piareersimanissaq.”
Arlaannik immikkut pikkoriffigisaqarpisi?
“Isumaqarpunga inuusuttut soqutigisai tusarnaarluartarigut. Taavalu 110 procentimik pimoorussisarluta. Assersuutigalugu nuannersunik unnussiuaarusuttarput, soorlu beach party-mik aaqqissuussinikuuvugut tassani sioqqat 12 tonsit klubbimut eqqussimavaat. Tassani jacuzzeqarlunilu allarpassuaqarpoq, taakkulu nuannariivippaat. Aammalu tupaallaatigivaat aaqqissuunnissaa qanoq annertutiginersoq. Taamaattorli naammagittaalliornatik suliaraat, tassa nammineq kissaatigisarimmassuk siunertaalu takusinnaallugu. Uagut aamma isumannaartarparput inuusuttut illoqarfimmiooqataanissaat ajortuliunngikkaluarlutik. Arsamik unammisoqaraangat vaffilinik kaffilmillu tuniniaasarput illoqarfimmilu sammisassanut naleqquttunut peqataasarlutik.
Inuusuttunut klubbi Húsið
2006-imi pilersinneqarpoq Klaksvikillu qeqqani inissisimalluni. Sapaatip akunnerata ingerlanerani nal. 23-ip tungaanut ammasarpoq, tallimanngornermi unnuap qeqqata tungaanut, arfininngornermilu nal. 01-ip tungaanut. Sulisut nalinginnaasumik perorsaasutut ilinniagaqarsimasuunngillat. Maannakkorpiaq sulisuupput sanaartornermi sulisoq, innaallagisserisoq, nipilersortartoq aamma assilisittartoq. Pingaarnerpaavoq meeqqanik inuusuttunillu oqaloqatiginnissinnaanissaat.
Aasaanerani feeriarnerup kingorna meeqqat 120-t missaat takkuttarput. Taava poorskereernerata kingorna affaannanngortarput silagikkaangat. Ualikkut unnukkullu maanga 60-70-it missaanni inuusuttuaqqat takkuttarput.
Pingasunngornerit tamaasa pannakaatortitsisarpugut, allatigulli sammisaqartarnerit amerlanerit pilersaarutaareersimanngitsuusarput inuusuttuniillu namminneq aqunneqartarlutik.
Beinta Árnadóttir Gregersen
48-nik ukiulik. Klaksvíkimi Klubi aallartinneqaqqaarmat peqataasimavoq. Ilinniartitsisutut ilinniarsimasuuvoq naalagaaffimmilu ilisimatusartutut ilinniarsimasuulluni. Inuusuttunut klubbi Húsið uummammioraa.
Del artiklen